கொழும்பு உயர் நீதிமன்றம், முன்னாள் உதவி காவல் அத்தியட்சகர் (ASP) குலசிறி உடுகம்பொல (Kulasiri Udugampola) மீது சுமத்தப்பட்டிருந்த ராணுவ புலனாய்வு பிரிவு அதிகாரிகள் தொடர்பான ரகசிய தகவல்களை வெளியிட்டதாக எழுந்த குற்றச்சாட்டில் இருந்து விடுதலை செய்து உத்தரவிட்டுள்ளது.
2002 ஜனவரி 2 ஆம் திகதி அதுருகிரிய மிலேனியம் சிட்டி வீட்டுத் தொகுதியில் ராணுவ புலனாய்வு பிரிவினரால் பயன்படுத்தப்பட்ட பாதுகாப்பு இல்லம் ஒன்றை சோதனையிட்டு, ராணுவ அதிகாரிகள் மற்றும் அவர்களின் ரகசிய நடவடிக்கைகள் பற்றிய தகவல்களை பகிரங்கப்படுத்தியதன் மூலம் தேசிய பாதுகாப்பை பாதித்ததாக முன்னாள் ASP மீது குற்றம் சுமத்தப்பட்டிருந்தது.
20 ஆண்டுகளாக நீடித்த விசாரணைகளைத் தொடர்ந்து, கொழும்பு உயர் நீதிமன்ற நீதிபதி ஆதித்ய பட்டபெந்திகே (Adithya Patabendge) இந்த தீர்ப்பை வழங்கினார். வழக்குத் தரப்பு குற்றச்சாட்டுகளை சந்தேகத்திற்கு இடமின்றி நிரூபிக்க தவறியதால், பிரதிவாதி விடுதலை செய்யப்பட்டதாக நீதிமன்றம் அறிவித்தது.
இந்த சம்பவம் நாட்டில் பெரும் சர்ச்சையை ஏற்படுத்தியிருந்த நிலையில், நீண்டகால சட்ட நடவடிக்கைகளுக்கு பின்னர் வழங்கப்பட்ட இத்தீர்ப்பு கவனத்தை ஈர்த்துள்ளது.