உக்ரைன் போர்: சவுதியில் அமெரிக்க-ரஷ்ய பேச்சுவார்த்தை ஆரம்பம்

அமெரிக்க மற்றும் ரஷ்ய அதிகாரிகள் திங்கட்கிழமை (24) சவுதி அரேபியாவில் பேச்சுவார்த்தைகளை ஆரம்பித்துள்ளனர். உக்ரைனில் நீடிக்கும் மூன்று ஆண்டு போரை முடிவுக்குக் கொண்டுவருவதற்கு பரந்த அளவிலான போர் நிறுத்தத்தை நோக்கிய முன்னேற்றம் மற்றும் கருங்கடலில் கப்பல் போக்குவரத்தை சுதந்திரமாக அனுமதிக்கும் கடல் போர் நிறுத்த ஒப்பந்தத்தை முதலில் பெறுவதே இதன் நோக்கமாகும்.

இந்த பேச்சுவார்த்தைகள், ஞாயிற்றுக்கிழமை அமெரிக்க அதிகாரிகள் உக்ரைன் தரப்புடன் நடத்திய சந்திப்பைத் தொடர்ந்து நடைபெறுகின்றன. அமெரிக்க ஜனாதிபதி டொனால்ட் ட்ரம்ப் (Donald Trump), கடந்த வாரம் உக்ரைன் ஜனாதிபதி வொலொடிமிர் ஸெலென்ஸ்கி (Volodymyr Zelenskiy) மற்றும் ரஷ்ய ஜனாதிபதி விளாடிமிர் புடின் (Vladimir Putin) ஆகியோருடன் பேசிய பின்னர், இப்போரை முடிவுக்கு கொண்டுவருவதற்கான முயற்சிகளை தீவிரப்படுத்தியுள்ளார்.

பேச்சுவார்த்தை திட்டமிடல்கள் பற்றிய தகவல்களை அறிந்த வட்டாரம் ஒன்று தெரிவிக்கையில், அமெரிக்க தரப்பை வைட் ஹவுஸ் தேசிய பாதுகாப்பு சபையின் மூத்த பணிப்பாளர் ஆன்ட்ரூ பீக் (Andrew Peek) மற்றும் மாநில திணைக்களத்தின் மூத்த அதிகாரி மைக்கல் ஆன்டன் (Michael Anton) ஆகியோர் வழிநடத்துவதாக கூறியது.

வைட் ஹவுஸ் தெரிவித்துள்ளதாவது, இப்பேச்சுவார்த்தைகளின் முக்கிய நோக்கம் கருங்கடலில் கடல் போர் நிறுத்தத்தை அடைவதாகும். இதன்மூலம் கப்பல் போக்குவரத்து தடையின்றி நடைபெற அனுமதிக்கப்படும்.

ரஷ்ய தரப்பில், முன்னாள் தூதுவர் மற்றும் தற்போது பெடரேஷன் சபையின் வெளியுறவு விவகாரக் குழுவின் தலைவராக உள்ள கிரிகோரி கராசின் (Grigory Karasin) மற்றும் பெடரல் பாதுகாப்பு சேவையின் பணிப்பாளரின் ஆலோசகர் செர்கெய் பெசேடா (Sergei Beseda) ஆகியோர் பங்கேற்கின்றனர்.

இப்பேச்சுவார்த்தைகள் உக்ரைன் மற்றும் ரஷ்யாவுக்கு இடையிலான மோதலை முடிவுக்கு கொண்டுவருவதற்கு முக்கிய பங்கு வகிக்கும் என எதிர்பார்க்கப்படுகிறது.