மியன்மார் மற்றும் தாய்லாந்து எல்லையில் இன்று (மார்ச் 28, 2025) 7.7 ரிக்டர் அளவிலான சக்திவாய்ந்த நிலநடுக்கம் ஏற்பட்டுள்ளது. இதன் அதிர்வுகள் தாய்லாந்து தலைநகரான பாங்கொக்கை உலுக்கியதுடன், அங்கு புரட்டிப்போடப்பட்ட சம்பவங்களும் பதிவாகியுள்ளன.
பாங்கொக் நகரில் பல உயர்ந்த கட்டடங்கள் குலுங்கியதாகவும், கட்டுமானத்தில் இருந்த பல அடுக்கு மாடி கட்டடங்கள் இடிந்து வீழ்ந்ததாகவும் தகவல்கள் தெரிவிக்கின்றன. குறிப்பாக, சட்ஜுக் சந்தைக்கு அருகில் கட்டப்பட்டு வந்த ஒரு உயர்ந்த கட்டடம் முற்றாக இடிந்து தரைமட்டமாகியுள்ளது. இதன்போது, அங்கு பணியாற்றிய கட்டுமான தொழிலாளர்கள் பலர் காணாமல் போயுள்ளதாகவும், குறைந்தது 43 பேர் சிக்கியிருக்கலாம் எனவும் உள்ளூர் ஊடகங்கள் தெரிவிக்கின்றன.
இந்நிலநடுக்கம் மியன்மாரின் மண்டலே நகருக்கு அருகில், சகாயிங் பகுதியிலிருந்து 16 கிலோமீட்டர் தொலைவில், 10 கிலோமீட்டர் ஆழத்தில் பதிவாகியுள்ளதாக அமெரிக்க நிலவியல் ஆய்வு மையம் (USGS) உறுதிப்படுத்தியுள்ளது. இதனைத் தொடர்ந்து 6.4 ரிக்டர் அளவிலான பின்னதிர்வும் ஏற்பட்டதால், பாங்கொக் மக்கள் அச்சத்தில் வீதிகளுக்கு ஓடி வந்தனர்.
கட்டடங்களிலிருந்து தண்ணீர் வெளியேறியதுடன், உயர்ந்த கட்டடங்களின் மேற்கூரைகளிலிருந்து பொருட்கள் விழுந்த சம்பவங்களும் பதிவாகியுள்ளன. தாய்லாந்து பிரதமர் பேடோங்ரன் சினாவத்ரா அவசர கூட்டத்தை கூட்டியுள்ளதுடன், பாங்கொக் நகரில் அவசர நிலை பிரகடனப்படுத்தப்பட்டுள்ளது.
மீட்பு பணிகள் துரிதமாக முன்னெடுக்கப்பட்டு வருகின்றன. இருப்பினும், பலியானோர் அல்லது காயமடைந்தோர் பற்றிய உறுதியான தகவல்கள் இதுவரை வெளியாகவில்லை. மேலதிக விபரங்களுக்காக காவல் துறையினர் மற்றும் மீட்பு குழுவினர் தீவிரமாக செயற்பட்டு வருகின்றனர்.