ஹொங்கொங்கில் அமுல்படுத்தப்பட்டுள்ள புதிய தேசிய பாதுகாப்பு சட்ட அமுலாக்க விதிகள் தொடர்பாக அமெரிக்கா விடுத்துள்ள பகிரங்க எச்சரிக்கைக்கு சீனா தனது கடும் அதிருப்தியையும் எதிர்ப்பையும் வெளியிட்டுள்ளது. இந்த மாத தொடக்கத்தில் ஹொங்கொங் அரசாங்கம் தனது பாதுகாப்பு சட்டங்களில் மேற்கொண்ட திருத்தங்களின்படி, தேசிய பாதுகாப்பு தொடர்பான வழக்குகளில் விசாரணையை எதிர்கொள்ளும் நபர்கள் தமது மின்னணு சாதனங்களின் (Mobile/Laptop) கடவுச்சொற்களை (Passwords) வழங்க மறுப்பது அல்லது தரவுகளைத் திறக்க ஒத்துழைக்க மறுப்பது தண்டனைக்குரிய குற்றமாகக் கருதப்படுகிறது. இந்தப் புதிய மாற்றங்கள் ஹொங்கொங்கில் உள்ள வெளிநாட்டு குடிமக்களின் தனிப்பட்ட சுதந்திரத்தைப் பாதிக்கும் எனக் கருதிய அமெரிக்கத் தூதரகம், கடந்த மார்ச் 26 அன்று தனது குடிமக்களுக்கு விசேட பாதுகாப்பு எச்சரிக்கை ஒன்றினை விடுத்திருந்தது.
அமெரிக்காவின் இந்த நடவடிக்கைக்கு எதிர்ப்புத் தெரிவிக்கும் வகையில், ஹொங்கொங்கிற்கான சீன வெளியுறவு அமைச்சகத்தின் ஆணையாளர் சுய் ஜியான்சுன் (Cui Jianchun), அமெரிக்கத் தூதர் ஜூலி ஈடேவை (Julie Eadeh) கடந்த மார்ச் 27 அன்று நேரில் சந்தித்துப் பேச்சுவார்த்தை நடத்தியுள்ளார். இதன்போது, ஹொங்கொங் விவகாரங்கள் மற்றும் சீனாவின் உள்நாட்டு விவகாரங்களில் எந்த வடிவத்திலும் தலையிடுவதை வாஷிங்டன் உடனடியாக நிறுத்திக்கொள்ள வேண்டும் என அவர் வலியுறுத்தியுள்ளார். ஹொங்கொங்கின் சட்ட அமுலாக்க நடவடிக்கைகளை அமெரிக்கா திட்டமிட்டுச் சிதைக்க முயற்சிப்பதாகச் சீனா இதன்போது சாடியுள்ளதுடன், இவ்வாறான எச்சரிக்கைகள் தேவையற்ற பதற்றத்தைத் தோற்றுவிக்கும் எனவும் சுட்டிக்காட்டியுள்ளது.
மத்திய கிழக்கில் அமெரிக்கா மற்றும் ஈரான் இடையே போர் தீவிரமடைந்து வரும் ஒரு இக்கட்டான சூழலில், ஆசியப் பிராந்தியத்தில் சீனா மற்றும் அமெரிக்கா இடையிலான இந்த இராஜதந்திர மோதல் சர்வதேச மட்டத்தில் உன்னிப்பாகக் கவனிக்கப்படுகின்றது. ஏற்கனவே வர்த்தகம் மற்றும் தொழில்நுட்பப் போட்டிகளில் இரு நாடுகளுக்கும் இடையே முரண்பாடுகள் நிலவி வரும் வேளையில், ஹொங்கொங்கின் புதிய பாதுகாப்பு விதிகள் இந்த விரிசலை மேலும் அதிகப்படுத்தியுள்ளன. அமெரிக்கக் குடிமக்கள் எவரேனும் இந்தப் புதிய விதிகளின் கீழ் கைது செய்யப்பட்டாலோ அல்லது தடுத்து வைக்கப்பட்டாலோ உடனடியாகத் தூதரகத்தைத் தொடர்பு கொள்ளுமாறு அறிவுறுத்தப்பட்டுள்ளமை, ஹொங்கொங்கில் உள்ள வெளிநாட்டு நிறுவனங்கள் மற்றும் முதலீட்டாளர்கள் மத்தியிலும் ஒருவித அச்ச உணர்வைத் தோற்றுவித்துள்ளமை குறிப்பிடத்தக்கது.
