தேசிய எரிபொருள் அனுமதிப்பத்திர (National Fuel Pass) முறையினைத் தொழில்நுட்ப ரீதியாகத் தவறாகக் கையாண்டு, மற்றுமொருவரின் வாகனத் தரவுகளைப் பயன்படுத்திப் போலி QR குறியீட்டை உருவாக்கிய பாரிய மோசடி ஒன்றினை குற்றப்புலனாய்வு திணைக்களம் (CID) அம்பலப்படுத்தியுள்ளது.
இந்தச் சட்டவிரோத நடவடிக்கை தொடர்பாக கம்பஹா மாவட்டத்தின் நிட்டம்புவ பகுதியில் முன்னெடுக்கப்பட்ட விசேட சுற்றிவளைப்பின் போது, பிலியந்தலை பிரதேசத்தைச் சேர்ந்த சந்தேகநபர் ஒருவர் கைது செய்யப்பட்டுள்ளார்.
மோசடி வெளிச்சத்திற்கு வந்த விதம்
குறித்த பெண் ஒருவர் தனது வாகனத்திற்குரிய எரிபொருள் ஒதுக்கீட்டைப் பெற முயன்றபோது, ஏற்கனவே அந்த வாகனத்திற்குரிய தரவுகள் பயன்படுத்தப்பட்டுப் புதிய QR குறியீடு ஒன்று உருவாக்கப்பட்டிருப்பதை அவதானித்துள்ளார். இது தொடர்பாக டிஜிட்டல் பொருளாதார அமைச்சின் 1919 என்ற அரசாங்க தகவல் மையத்தின் துரித இலக்கத்திற்கு வழங்கப்பட்ட முறைப்பாட்டினைத் தொடர்ந்து, கணினி குற்றப் புலனாய்வுப் பிரிவின் கீழ் இயங்கும் 'Cyber Surveillance and Intelligence' பிரிவினர் விசாரணைகளைத் தீவிரப்படுத்தினர்.
தொழில்நுட்ப ரீதியான ஊடுருவல்
சந்தேகநபர், அந்தப் பெண்ணின் வாகனப் பதிவு இலக்கங்கள் மற்றும் உரிமையாளர் விபரங்களைச் சட்டவிரோதமாகப் பெற்று, மென்பொருள் ஊடாக அதன் QR முறையினை (Override) மாற்றியமைத்துள்ளார். இவ்வாறு உருவாக்கப்பட்ட புதிய QR குறியீட்டைப் பயன்படுத்தி அவர் பலமுறை எரிபொருளைப் பெற்று வந்தமை விசாரணைகளில் உறுதிப்படுத்தப்பட்டுள்ளது.
விரிவடையும் விசாரணைகள்
சந்தேகநபரால் உருவாக்கப்பட்ட இந்தப் போலி QR குறியீட்டை ஏற்றுக்கொண்டு, அதற்கு எரிபொருள் வழங்கிய எரிபொருள் நிரப்பு நிலைய ஊழியர்கள் அல்லது வேறு எவரேனும் இச்சதிக்கு உடந்தையாக இருந்தனரா என்பது குறித்து CID-யினர் தற்போது தீவிர விசாரணைகளை முன்னெடுத்து வருகின்றனர்.
எதிர்காலத்தில் இவ்வாறான QR குறியீட்டுத் திருட்டுகளைத் தவிர்க்கும் பொருட்டு, தேசிய எரிபொருள் அனுமதிப்பத்திர முறைமையில் மேலதிக பாதுகாப்பு அம்சங்களை அறிமுகப்படுத்த டிஜிட்டல் பொருளாதார அமைச்சு திட்டமிட்டுள்ளது. பொதுமக்களும் தமது வாகனத் தரவுகளை அறிமுகமில்லாத நபர்களிடம் வழங்க வேண்டாம் என எச்சரிக்கப்பட்டுள்ளனர்.
